La Comunautat de Comunas deu Canton d’Ortès qu’organiza despuish 2005 accions en favor de la promocion de la lenga en partenariat dab associacions locaus.
Aqueras accions que comencèn modestament dab lo « Dia de la lenga » en 2005 (disnar au parat de la hera d’Ortès) ; puish dab ua purmèra « Setmana de la lenga » en 2006, qui estó renovelada d’annada en annada. Qu’ei hèita de : seradas canterias, conferéncias, accions e animacions pedagogicas auprès deus escolans e deus mainats deus centres de lesers, espectacles, concèrts, sopars seguits d’un bal gascon…
Puish la Comunautat de Comunas qu’a sentit la hami de mercar la soa accion per d’autes temps en l’annada en un programa nomat « Cultura de noste » e qui prepausa : cantèras, batalèras, randolejadas bilinguas francés/bearnés (occitan), pèças de teatre, conferéncias, picahòu, esperoquèra, vrenhas e d’autas animacions calendàrias.
La Comunautat de Comunas deu Canton d’Ortès qu’a entamenat ua accion entà espandir l’utilizacion e la visualizacion de la lenga bearnesa/occitana en totas las soas accions : panèus Relais Informacions Servicis sus la plaça de las mairias deu canton, panèus d’entrada de camins de randolejadas, supòrts de comunicacion…
Qu’a prepausat la soa candidatura au Conselh generau entà plaçar panèus bilingües d’entrada de vilas e de vilatges.
